सम्पादकीय [२०८० कार्तिक - २०८१ कार्तिक]

अहिले प्यालेस्टाइन राज्य युद्धग्रस्त क्षेत्रका रूपमा भग्नावशेष बन्ने क्रममा छ । सात अक्टोबर सन् २०२३ मा प्यालेस्टिनी लडाकु समूह हमासले इजरायलमा गरेको सशस्त्र हमलामा परी दस जना नेपाली विद्यार्थीको ज्यान गयो, केही घाइते भए र एक जना बन्धक बनाइए । यस घटनाबाट स्वाभाविक रूपले नै साधारण जनमानसमा प्यालेस्टिनीहरूप्रति नकारात्मक धारणा उत्पन्न भयो र हमासका आतङ्ककारी गतिविधिविरुद्ध सामाजिक सञ्जालमा तिखो आलोचना पनि भयो । कतिपय बुद्धिजीवीहरू समेत वास्तविकता प्रकाश पार्नुको साटो उनीहरूकै अभिव्यक्तिका पछि दौडिएको देखियो । जनताहरू बसोबास गरेका क्षेत्रमा क्षेप्यास्त्र प्रहार हुनु निन्दनीय घटना त हो नै, त्यसमा पनि नेपाली विद्यार्थीहरू हताहत हुनु र अपहरणमा पर्नु दुःखद हुने त भइहाल्यो । त्यसो भए पनि प्रत्याक्रमणको बाहनामा गाजा बस्तीलाई नै खाली गराएर त्यो भूमि आफ्नो अधीनमा राख्न इजरायलले प्यालेस्टिनी जनतामाथि गरेको दमन र बर्बरतापूर्ण हत्याको जति भत्र्सना गरे पनि कम हुन्छ । गाजाका अस्पतालसमेत बाँकी नराखेर गरेको इजरायली हमलामा हालसम्म ३४ हजारभन्दा बढी प्यालेस्टिनी नागरिकको मृत्यु भइसकेको छ भने इजरायलभित्रैबाट समेत यस्तो क्रूर आक्रमणको आलोचना र विरोध भइरहेको छ । अमेरिकी साम्राज्यवादको बुई चढेको इजरायलले गरेको आफ्नै आश्रयदाताहरू माथिको अत्याचार र पटक पटक दोहोरिने इजरायल प्यालेस्टाइन युद्धको वास्तविकता, इजरायलको भूमिका, प्यालेस्टिनी जनताको न्याय र प्यालेस्टिनी राज्यसत्तामा रहेको हमासका गैरजिम्मेवार गतिविधिहरूमाथि छलफल गर्ने उद्देश्यका साथ पारिजात स्मृति केन्द्रले २०८० कार्तिक १७ गते प्यालेस्टिनी जनतामाथिको युद्ध अपराधविरुद्ध कविता वाचन कार्यकमको आयोजना गरेको थियो । सोही कार्यक्रमको अभिलेखन तथा विस्तार गरेर प्रस्तुत अङ्कलाई इजरायल प्यालेस्टिन युद्धमा केन्द्रित गरिएको हो । अहिलेको स्थितिमा हमासले लिएको बदलाको रणनीतिबाट मध्यपूर्वमा वर्गीय समस्या त समाधान हुँदैन । शान्तिपूर्ण वार्ताबाट नभई सशस्त्र युद्धबाट नै आधिकारिक प्यालेस्टाइन राज्यको स्थापना गर्ने उद्देश्य बोकेको हमासका पछिल्ला कदमहरू आलोच्य पनि छन् । लडाकु समूह मात्र नभएर गाजाको शासक पनि भएकाले प्यालेस्टिनी नागरिकहरूप्रतिको जिम्मेवारी र दायित्वको प्रश्न सबैभन्दा बढी हमासतर्फ सोझिनुपर्छ किनभने आफूहरू देशबाहिर बसेर युद्ध सञ्चालन गर्ने र देशभित्रका निर्दोष नागरिकलाई युद्धको विभीषिका खप्न बाध्य बनाउने हमासको नेतृत्व अत्यन्त गैरजिम्मेवार देखिएको छ । प्यालेस्टिन भूमि र त्यहाँका जनताका समर्थक रहेको विश्वसमुदायले सहयोग र न्यायका लागि समर्थन गर्ने हो तर उन्मुक्तिको पहल र विकल्पको खोजीमा त्यहाँका जनता नै निर्णायक हुनुपर्छ । यो कार्य धर्मभीरु हमासबाट होइन, जनताको मुक्ति त समाजवादी ध्येय बोक्ने जनपक्षीय शक्तिबाट मात्र सम्भव छ ।

मध्यपूर्व युद्धको बर्बरतामा बाँचिरहेको अहिलेको समयमा युद्धअपराधीहरूमा दबाब सिर्जना गर्न र यसको अन्त्यका लागि सम्पूर्ण मानवसमुदायलाई आ–आफ्ना स्थानबाट पहल गर्नका लागि पनि युद्धअपराध विशेष अङ्क जस्ता प्रकाशनले सहयोगी भूमिका निर्वाह गर्न सक्छन् । हाम्रो यस अभियानसँग हातेमालो गर्दै आफ्ना अमूल्य कविता, समालोचना र लेख उपलब्ध गराएर सहयोग गर्ने कवि र लेखकहरूप्रति हामी हार्दिक आभार प्रकट गर्दछौँ । इजरायल–प्यालेस्टाइन युद्धमा मृत्युवरण गरेका नेपाली विद्यार्थीसहित समग्र सर्वसाधारण नागरिकहरूप्रति श्रद्धासुमन अर्पण गर्दै हामी इजारायली युद्धअपराधको विरोध तथा समग्र प्यालेस्टिनी जनताको न्यायका पक्षमा ऐक्यबद्धता प्रकट गर्दछौँ ।

000